PLaN PaRa a PRoMoCióN ​De eSTiLoS De ViDa SauDaBLeS

Gústame o alumnado que actúa con intelixencia emocional e que cunha gran autoestima e personalidade defende o seu estilo de vida saudable.

A Promoción da saúde diríxese á mellora as competencias en saúde das persoas, onde o coidado da contorna e da sociedade na que vivimos ocupa un papel relevante.
 Un estilo de vida saludable e algo más que o “non fumar”, comer san, non beber alcohol e facer exercicio;  tamén debemos concibir a maneira xeral de vivir as persoas e grupos sociais, onde se deben incluír formas de pensar, de comportarse, dándolle una gran importancia á educación emocional e social.
Debemos inculcar no alumnado e en calquera persoa en xeral que  a saúde é un recurso para a vida, non un obxectivo. A idea que subxace sempre é a de “formar ó discente nunha mellora das súas competencias en relación ás súas capacidades  para adoptar un comportamento adaptativo e positivo que permita aos individuos abordar con eficacia as esixencias e desafíos da vida cotiá” (Educación en Habilidades de vida nas Escolas, OMS 1993).

2018
O alumnado de 1º ESO do IES de Melide gaña o primeiro premio no Congreso Aliméntate ben para centros de secundaria e formación profesional iniciativa da Xunta de Galicia (Consellería de Sanidade; Cultura, Educación e Ordenación Universitaria; Medio Rural; Mar; Economía, Emprego e Industria; e Política Social.

En pre-produción, cando abordamos o guión literario, investígamos e nos documentamos cos traballos que relacionan o currículo das diferentes materias coa saúde en xeral e coa alimentación en particular. 
​Estamos a falar dunha fase de enriquecemento curricular por proxectos transversais baseados na mellora das competencias clave, baixo liderados compartidos co alumnado e utilizando metodoloxías colaborativas facilitadas por un uso creativo e interactivo das TICs.
     Para o deseño das secuencias e escenas da película, fixéronse actividades relacionadas coa análise das dietas doutros países, actividades de información nutricional do etiquetado de alimentos, de como atender ós reclamos publicitarios, da necesidade de ir máis ós mercado “de toda a vida” (garante de produtos naturais e saudables),  de ser coherentes co noso organismo deseñado para moverse, e de como evitar as enfermidades relacionadas co sobrepeso e a obesidade...

2017
1º e 2º PREMIO PARA O ALUMNADO DO IES DE MELIDE EN CLASES SEN FUME 

​O conselleiro de Sanidade, Jesús Vázquez Almuiña, presidiu hoxe o acto de entrega de premios do concurso educativo para a prevención do tabaquismo Clases sen Fume, que organiza a Consellería de Sanidade, a través da súa Dirección Xeral de Saúde Pública, en colaboración coa Consellería de Cultura, Educación e Ordenación Universitaria. Nesta edición 2016-2017 participaron un total de 3.331 escolares de 152 aulas, procedentes de 59 centros diferentes de toda Galicia. O principal obxectivo deste concurso educativo é evitar o inicio do consumo de tabaco nas mozas e mozos galegos, ou, cando menos, atrasar a idade dese inicio. 

2015
O IES de Melide gaña o 1º Premio como mellor proxecto do Programa ALIMENTA-T BEN   (froita ecolar) 

O xurado composto por representantes do Fondo Galego de Garantía Agraria e da Dirección Xeral de Educación, Formación Profesional e Innovación Educativa premiou o proxecto presentado “5 ao día: IES VIDA", de entre máis de 100 proxectos participantes de centros educativos de toda Galicia.

O contido do citado premio consiste nunha achega dun bono de 800 euros para material nformático para o centro, libros sobre hábitos saudables para a biblioteca do centro e certificación emitida pola Consellería de Cultura, Educación  e Ordenación Universitaria de premio de Innovación educativa para os seis profesores e profesoras participantes.

2013
1º  PREMIO PARA O ALUMNADO DO IES DE MELIDE EN SALVAVIDAS

A Consellería de Sanidade conmemora o Día Nacional do Doador nun acto no que entregou os premios do III concurso de curtametraxes para escolares relacionado coa doazón e os transplantes.
O primeiro premio foi para o Instituto de Ensinanza Secundaria de Melide, por: “Chegado o momento...ti podes poñer en marcha ó equipo”. 

Xerar actitudes e comportamentos no alumnado esixe tempo, constancia e coherencia na mensaxe.
​Debemos poñernos de acordo e traballar xuntos nos diferentes ámbitos a sabendas de que tempo corre na nosa contra: as condicións psicopedagóxicas do alumnado favorecen que o proceso sexa, dentro da dificultade, máis fácil que cos adultos.
Debemos reflexionar sobre as pedagoxías que se están a levar a cabo nos centros escolares, e ser valentes en apostar por un traballo por proxectos coordinados. A saúde configúrase como un axente prioritario e con suficiente entidade para apostar por el. Só así poderemos afrontar as demandas que esta sociedade nos esixe.

Necesidade dunha intervención integrada desde diferentes ámbitos
      
Un plan para a promoción da saúde na escola precisa dunha intervención integrada desde diferentes ámbitos. Propoñemos algunhas medidas e intervencións  para incrementar hábitos saudables en relación ó alumnado, ás familias, ó  claustro de profesores, no ámbito da política local e da empresa…


Importancia da concreción de obxectivos nos diferentes documentos de centro

Cremos necesario un tratamento integrado que recolla a participación de toda a comunidade educativa dun centro para que as intervencións de educación para a saúde sexan efectivas e así mesmo constatamos a necesidade de concretar os obxectivos relacionados coas intervencións para a saúde nos documentos do centro: programación anual, proxecto educativo de centro, programacións didácticas, proxecto de acción titorial, plan de convivencia, proxecto de actividades complementarias e extraescolares.

Aposta polos proxectos transversais
​
Queremos reflexionar sobre as pedagoxías que se están a levar a cabo no noso centro, e ser valentes en apostar por un traballo por proxectos coordinados. A saúde configúrase como un axente prioritario e con suficiente entidade para apostar por el. Só así poderemos enfrontar as demandas que esta sociedade nos esixe.

A figura dun grupo impulsor dos programas 
 
É de suma importancia a figura dun axente impulsor das accións en favor da promoción da saúde nun centro. Ó noso entender debería estar formado por un representante do equipo directivo, un representante do departamento de orientación, un representante do equipo de biblioteca, un profesor de educación física, un profesor das materias vinculadas ás linguas, un profesor das materias vinculadas ás ciencias, un representante do alumnado, un representante da ANPA e un representante do persoal non docente.
O subgrupo conformado polo profesorado debería contar con tempos de coordinación facilitados por coincidencias no seu horario persoal, posto que tería o importante labor de asesorar e proporcionar documentos e actividades para facilitarlles o labor ó resto do profesorado e que este fose capaz de levala a práctica.

2017
Acto de clausura Clases sen fume na provincia da Coruña (IES de Melide)

​O IES de Melide foi escollido para albergar o acto de clausura de esta 15ª edición por ser o centro con maior participación de aulas neste curso escolar, non só na provincia da Coruña senón tamén de toda Galicia, cun total de nove aulas e 158 escolares de primeiro e segundo da ESO. O IES de Melide participou en oito edicións, gañando un accésit a mellor actividade creativa no curso 2013-2014 e o premio Fogares sen fume no curso 2014-2015.
Nun acto moi dinámico e ameno, un grupo de alumnos e alumnas de 1°e 2° de ESO e tamén de 1° de BAC, en representación de todos os seus compañeiros e compañeiras, presentaron o traballo realizado a través de diferentes improvisacións teatrais e proxeccións audiovisuais.
Este programa, CLASES SEN FUME, é un concurso educativo para a prevención do tabaquismo, dirixido a escolares de primeiro ciclo de ESO, é dicir de 12 a 14 anos, idade na que se dan os primeiros contactos co tabaco, tendo ás comunidades educativas como instrumento indispensable para a execución do proxecto.
Ó acto asistiron o Delegado Territorial da Xunta de Galicia na provincia de A Coruña, a Xefa Territorial de Sanidade, a Alcaldesa de Melide e a coordinadora do programa “Clases Sen Fume”.
Parabéns para os nosos alumnos e alumnas, polo seu saber estar e seu alto grao de implicación neste programa.

2014
Acto de entrega de premios Clases Sen Fume 

O IES de MELIDE foi invitado a participar no acto de entrega de premios do concurso educativo para a prevención do tabaquismo Clases sen Fume, que organiza a Consellería de Sanidade, a través da súa dirección xeral de Innovación e Xestión da Saúde Pública, en colaboración coa Consellería de Cultura, Educación e Ordenación Universitaria. Nesta edición 2013-2014 participaron un total de 4.157 escolares, pertencentes a 182 aulas e 73 centros educativos. O principal obxectivo deste concurso educativo é evitar o inicio do consumo de tabaco nas mozas e mozos galegos, ou, cando menos, atrasar a idade dese inicio.
A clase de 2º ESO C recibiu o seu premio na categoría de actividade creativa.